Mjög auðveld, falleg og girnileg stjarna sem allir í fjölskyldunni okkar elska.
Fullkomin jólauppskrift.
Stærsti hlutinn af heildar tímanum fer í að láta deigið lyfta sér, framkvæmdin sjálf tekur stuttan tíma.
Þessi uppskrift er með Nutella, en einnig er hægt að nota annars konar fyllingu, t.d. smyrja með smjöri og kanilsykri eða með pizzusósu, osti og fræjum.
Ef ykkur dettur einhver önnur sniðug fylling í hug, endilega látið vita í kommentum.
Hitið mjólkina svo hún sé volg. Hrærið gerinu út í mjólkina þar til það er allt leyst upp, getur tekið nokkrar mín (ekki kremja gerið með skeiðinni, þá lyftir það sér minna).
Bræðið 30g smjör.
Hrærið saman í stóra skál 450g hveiti, 2 eggjarauðum, smá salt og 1/3 bolli af sykri.
Setjið mjólkina með gerinu saman við hveitiblönduna og hrærið/hnoðið degið saman þar til það er slétt og einsleitt.
Breiðið yfir skálina og látið deigið lyfta sér þar til það hefur náð tvöfalldri stærð, ca 1 klst.
Þegar deigið er búið að lyfta sér, takið það úr skálinni og deilið í 4 jafna hluta. Gott að forhita ofninn núna í 180°C.
Fletjið einn hlutann í hring ca 20cm í þvermál. Það er sniðugt að nota disk til að finna réttu stærðina.
Þrýstið diskinum á deigið til að marka hringinn en ekki skera kantana af strax.
Takið diskinn af og færið deigið yfir á bökunarpappír á ofnskúffu.
Smyrjið Nutella innan hringsins (kantarnir verða skornir af seinna).
Fletjið út næsta hluta, markið með diskinum, leggjið ofan á fyrri Nutella-smurða hringinn og smyrjið Nutella ofan á.
Endurtakið með þriðja hlutann.
Fletjið út fjórða hlutann og setjið ofan á staflann á ofnskúffunni.
Setjið diskinn ofan á og skerið kantana af í kringum svo þið fáið fullkomlega mótaðan hring. Nota má kantana til að búa til litla snúða og baka með.
Setjið bolla eða glas létt á miðju hringsins (ekki þrýsta mjög fast niður) og skerið deigið í fjóra jafna hluta út frá glasinu að kantinum.
Skerið þessi fjögur “krónublöð” hvert um sig í tvennt og svo þá hluta aftur tvennt. Núna eigið þið að vera með 16 jafn stór “krónublöð”, með óskorinn hring í miðjunni. Takið bollann/glasið af.
Takið tvö aðliggjandi “krónublöð” og snúið þeim á móti hvort öðru tvo snúninga.
Endurtakið þetta 8 sinnum, svo öll 16 “krónublöð” eru snúin.
Takið tvö aðliggjandi snúin “krónblöð” og snúið þeim aftur einn snúning að hvoru öðru og þrýstið endunum saman svo þeir festast. Gerið þetta með öll 8 pör af “krónublöðum”.
Þeytið/pískið eggjahvítuna aðeins og penslið yfir kökuna.
Setjið stjörnuna í ofninn og bakið í ca 20 mín eða þar til hún er gullin að lit.
Uppskriftabók
